Korali Abatoranijwe-Murambi (ADEPR Gatenga) irakataje mu bikorwa by’ivugabutumwa!

Mu gihe hari hashize iminsi mike Korali Abatoranijwe ikorera umurimo w’Imana muri ADEPR paruwasi ya Gatenga ikoze igitera cy’ivugabutumwa, iki giterane cyagaragayemo abahanzi batandukanye bahimaza Imana cyashimishije benshi n’ubundi iyi korali ikomeje ibikorwa by’ivugabutumwa bitandukanye aho mu mpera z’icyumweru gishize yitabiriye igiterane cy’ivugabutumwa mu rurembo rwa Gitarama, Paruwasi ya Bulinga aho yari yatumiwe.

Mu gitondo cyo kuri uyu wa gatandatu w’icyumweru gishize nibwo Korali Abatoranijwe yahagurutse ku mudugudu wa Murambi ho muri Paruwasi ya ADEPR-Gatenga aho isanzwe ikorera umurimo w’Imana yerekeza mu rurembo rwa Gitarama, Paruwasi ya Bulinga aho yari yatumiwe mu giterane cy’ivugabutumwa cyateguwe n’umudugudu wa Buramba.

Muri iki giterane cyamaze iminsi ibiri hakijijwe bwa mbere abantu bashya barenga 35, abandi benshi basubizwamo imbaraga.
Umuyobozi w’umudugudu wa Buramba ari nawo wateguye iki igiterane Pasteri NTIHABOSE Valens mu izina ry’umudugudu wose yishimiye cyane umusaruro wabonetse ashimira cyane korali Abatoranijwe yemeye kuza kubatera ingabo mu bitugu mu rugamba rwo gukomeza kuzana abantu kuri Yesu.

Pasteur NTIHABOSE yagize ati « Twarishimye cyane kuba mwaremeye kuza iwacu ngo dufatanye, kandi twishimiye cyane abantu bakijijwe natwe tuzakomeza kubitaho, twifuza rero ko mwagaruka vuba kuko twabakunze cyane ».

Muri byinshi byanejeje benshi ni umuziki w’imbonankubone bakunda kwita Live music ( Soma Layive miyuziki) waryoheye abitabiriye igiterane aho indirimbo zose zacuranzwe hakoreshejwe ubu buryo buri muri bimwe iyi korali yihariye ubusanzwe kuko ngo aribwo ihora ikoresha naho isanzwe ikorera, tutirengagije n’abavugabutumwa bakomeje kwibanda ku magambo akeburira abantu kureka ibyaha bagakizwa.

Korali Abatoranijwe yatangiye umurimo w’Imana mu 1995 itangirana Abaririmbyi 16, ikaba yaragiye itera imbere mu buryo butandukanye ari nako yagura ibikorwa byayo ubu ikaba ifite abaririmbyi bagera hafi kuri 80.